你個單位向邊？幾點有太陽？

座向係咩，同「有冇太陽」爭幾遠

座向講嘅係窗口面向邊個方位。傳統講「坐北向南」最好，因為南向日照最平均、夏天唔會曬入屋太深。 但呢套講法假設咗周圍冇嘢擋 —— 喺香港，擋住你嘅通常就係隔離嗰幢樓。

同一個南向單位，十二樓對正對面屋苑嘅座數，可能全日零分鐘直射太陽；三十樓越過咗對面天台， 一日有五、六個鐘。呢個差別唔係朝向決定，係朝向加高度加周圍樓宇三樣一齊決定。

西斜點算？

西向同西南向單位夏天下晝會曬足幾個鐘，室溫同冷氣費都跟住升。 如果你主要想知呢樣，去西斜查詢嗰頁，工具會預設幫你揀咗西向。

我哋點計出嚟

• 實景三維模型 —— 用地政總署嘅 3D Visualisation Map （1:1000 分幅、實景貼圖）砌返你幢樓同周圍嘅樓，唔係一嚿方盒。
• 真實地形 —— 香港成半嘅樓起喺斜坡上，山身本身都會遮太陽， 所以連地形同遠處嘅山脊都計埋。
• 逐分鐘睇天空 —— 由你揀嗰個窗口位置望出去， 計太陽軌跡上每一分鐘係曬到、俾樓擋住，定係喺牆背面，再夾埋成年十二個月嘅變化。

準確度：只計直射陽光，唔計雲、玻璃反射同露台遮擋；體塊精度約四米，所以日照起訖時間可能相差五到十分鐘。 三維模型同地形資料：香港特別行政區政府地政總署。地址搜尋：地政總署地址資料服務（ALS）。

免費用，唔使登記

揀好樓層同朝向就計得，唔使開戶、唔使留電郵。日期同時間隨你調，睇夏至、冬至、今日都得； 想比較第二層或者第二個朝向，喺同一張地圖度再揀過就得。

想自己喺地圖度慢慢揀，可以直接打開地圖。想睇樓齡、大維修命令同校網，去樓宇紀錄同校網查詢。