居屋成交價：逐層逐伙睇 63,592 個單位

同一座樓，最平同最貴單位差 31%

我哋將同一期賣出 30 個單位以上嘅 92 座樓逐座比較：同座最貴單位嘅呎價，中位數比最平嗰個貴 31%，最多貴 63%。89 座入面，89 座都係 25 樓或以上比 10 樓或以下貴，中位數貴 8.6%；就算同一層，唔同單位都差 8.1%。

例如青富苑A座：同一期賣咗 1,176 個單位，呎價由 $4,433 到 $5,973。每個單位嘅售價，係房委會對嗰個單位評估嘅市值乘以折扣 —— 所以樓層表上邊度深色，就係房委會覺得邊度值錢。

面積同樓層之外，朝向同景觀都影響價錢 —— 想知某個單位實際曬唔曬到太陽，可以用座向・日照工具。

買入時幾折，將來就補幾多價

居屋業主日後想喺公開市場出售，要先向房委會補價：金額 = 當時評估市值 × 買入時嘅折扣率。以居屋2024 七折買入，補 30%；居屋2022 五一折買入，就要補 49%。所以同一個屋苑、同一個面積，唔同期數買入，將來賣樓實收可以差好遠。工具入面撳任何一個單位，都會寫明佢嗰期嘅折扣同補價比率。

幾多年內只可以賣返畀房委會、或者喺第二市場賣，每期規定唔同，以房委會嗰期嘅銷售說明書為準。

呢度冇嘅嘢

• 最新一期嘅成交。房委會每期賣完先公佈成交紀錄，最新係綠置居2024（簽約至 2026 年 1 月）；居屋2025、綠置居2025 未有。
• 今日值幾多。呢度係首次出售價；二手成交要去土地註冊處查，而且已補價同未補價嘅居屋價錢唔同。
• 單位朝向、景觀、間隔。資料只有樓層、單位號碼同面積；房委會定價時考慮嘅其他因素，只能從價錢反映出嚟。